Маргарита Мельникова сӑнӳкерчӗкӗ

Паянхи кун тӗлне пирӗн республикӑра Тӑван ҫӗршывӑн аслӑ вӑрҫине хутшӑннӑ 65 ветеран пурӑнать. Вӗсенчен чи асли – Етӗрнери Иван Ермолаев. Иван Васильевич кӑҫал 105 ҫултарӗ.

Вӑрҫа хутшӑннисен арӑмӗсем республикӑра — 968-ӑн; 2,5 пине яхӑн тыл ӗҫченӗ, концлагерсенче ачалла пулнӑ 26 ҫын, блокадӑри Ленинградра пурӑннисем 24-ӑн.

Хальхи вӑхӑтра хулари тӳре-шара вӑрҫӑ ветеранӗсене киле ҫитсе саламлать. Паян ӗҫ тата социаллӑ хӳтлӗх министрӗ Алена Елизарова тата Шупашкар хулинчи халӑхӑн социаллӑ ыйтӑвӗсене тивӗҫтерекен комплекслӑ центрӑн пуҫлӑхӗн тивӗҫӗсене пурнӑҫлакан Аркадий Скворцов Агриппина Янукович патӗнче пулнӑ.

culture.cap.ru сӑӳкерчӗкӗ

Мускаври Б.В. Щукин ячӗллӗ Театр институчӗ 2025 ҫулта чӑваш ҫасмрӑкӗсене артист пулма тӗллевлӗ вӗрентсе кӑларма йышӑнӗ. Актё пулас ӗмӗтлисене чӑваш сценин ӑстисем театр студийӗнче пултарулӑха туптама хӑнӑхтарӗҫ.

«Тӗллевлӗ вӗренме илесси пирки нумаях пулмасть институт ректорӗпе, Раҫҫей халӑх артисчӗпе Евгений Князевпа тӗл пулсан калаҫса татӑлнӑ», — пӗлтернӗ республикӑн культура министрӗ Светлана Каликова.

Мускаври Театр институчӗ 12 ҫынна тӳлевсӗр вӗренме илме хатӗр. Актёр пулас ӗмӗтлисене кунти артистсем конкурс витӗр суйласа илӗҫ.

Телеграмри t.me/SergeyKolyasnikov каналтан илнӗ сӑнӳкерчӗк

Паян, ҫу уйӑхӗн 7-мӗшӗнче, Раҫҫей Правительствине отставкӑна янӑ. Ку вӑл Владимир Путинӑн инаугурацийӗ хыҫҫӑн пулнӑ.

Пӗлтерер: паян Владимир Путин черетлӗ 5 ҫуллӑха Президент тилхепине савӑнӑҫлӑ лару-тӑрура тытрӗ.

Ун хыҫҫӑн кивӗ Правительсьтвӑна отставкӑна янӑ. Ҫӗнӗ йыша кӗмелли министрсен кандидатурисене ҫу уйӑхӗн 15-мӗшӗччен пӑхса тухмалла.

cap.ru сӑнӳкерчӗкӗ

Тӑвай районӗнче М-12 «Хӗвелтухӑҫ» ҫула тунӑ чухне ваннӑ ҫула юсама тытӑннӑ. Асӑннӑ ӗҫе «Энӗш» тата «Тӑвай-Чутей-Аслӑ Кайбицы» ҫулӑн Тӑвай районӗнчи пайӗнче пурнӑҫлаҫҫӗ.

«Энӗш» ҫул ҫинчи 5 пин тӑваткал метр ытла лаптӑк ҫинчи кивӗ асфальта илсе ҫӗнннине сарӗҫ, «Тӑвай-Чутей-Аслӑ Кайбицы» ҫул ҫинче – 35 пин тӑваткал метр.

Юсав ӗҫне пурнӑҫлаканни — «Автодор» предприяти. ӖҪе пурнӑҫланине саплаштармалли тӑкака «М-12» ҫулӑн проектне тунӑ чухне пӑхса хӑварнӑ.

Шупашкарти Чапаев музейӗ 1974 ҫулхи ҫу уйӑхӗн 9-мӗшӗнче уҫӑлнӑ. Вӑл хута кайнӑранпа 50 ҫул ҫитнӗ. Ыран музей юбилейне паллӑ тӑвать.

Уява Василий Чапаевӑн мӑнукӗн мӑнукӗ ҫемйипе пӗрле килӗ. Александр Чапаев музея парне парассине пӗлтернӗ. Вӑл кӗтмен парне пулӗ, ун пирки ҫу уйӑхӗн 8-мӗшӗнче кӑна паллӑ пулӗ. Ҫакна кӑна систернӗ: парне Василий Чапаевӑн аслӑ ывӑлӗпе Александр Чапаевпа, Тӑван ҫӗршывӑн Аслӑ вӑрҫипе ҫыхӑннӑ.

Сӑмах май, нумаях пулмасть Чапаев музейӗнче юсав тата реэкспозици тунӑ.

cap.ru сайтри сӑн

Шупашкарӑн 555 ҫулхи юбилейӗ тӗлне кӑларнӑ медальсене пама тытӑннӑ. Вӗсене Тӑван ҫӗршывӑн Аслӑ вӑрҫин ветеранӗсем тивӗҫнӗ. Медале 27 ветерана панӑ.

Вӗсен йышӗнче – Сӗнтӗрвӑрри округӗнче пурӑнакан 97-ри Аркадий Еремеев. Вӑл фронта 1944 ҫулта кайнӑ. Ҫӗрпӳ тӑрӑхӗнче пурӑнакан Георгий Александров та медале тивӗҫнӗ. Вӑл – 96 ҫулта. Михаил Сорокин ҫитес ҫул юпа уйӑхӗнче 100 ҫул тултарать. Вӑл 16 ҫулта чухне Сӑр тата Хусан хӳтӗлев чиккисене тунӑ ҫӗре хутшӑннӑ. Икӗ ҫултан ӑна ҫара илнӗ. Паттӑрлӑх кӑтартнӑшӑн Михаил Григорьевича II степень Тӑван ҫӗршыв вӑрҫин орденӗпе чысланӑ.

cap.ru сайтри сӑн

Ҫу уйӑхӗн 9-мӗшӗнче «Ҫӗнтерӳ ҫурти» акци иртӗ. Шупашкарта вӑл каҫхи 9 сехетре Петӗр Хусанкай ячӗллӗ культура керменӗ умӗнче пулӗ.

Ҫак акци Раҫҫейӗпех иртӗ. Йӑлана кӗнӗ тӑрӑх, Чӑваш Ен те унта хутшанӗ. Ҫӗнтерӳ кунӗнче ҫынсем Тӑван ҫӗршывӑн Аслӑ вӑрҫинче пуҫ хунӑ паттӑрсене асра тытса ҫурта ҫутӗҫ.

Ҫунакан ҫурта – хӑйне евӗр «астӑвӑм кӗперӗ». Вӑл иртнипе хальхине ҫыхӑнтарать, истори астӑвӑмне ӑруран ӑрӑва парасси пӗлтерӗшлӗ пулнине палӑртать.

Ҫӗмӗрлери ача-пӑча пултарулӑх центрне тӗпрен юсама палӑртнӑ. Проекчӗ патшалӑх экспертизи витӗр тухнӑ.

Пӳлӗмсенче кӑштах перепланировка тума палӑртнӑ. Пӗрремӗш хутра коворкинг-зона, виртуаллӑ музей, игротека, апатланмалли вырӑн тата буфет пулӗҫ.

Палӑртмалла: ҫак ҫурта 1954 ҫулта Барташевич архитекторӑн проекчӗпе неоклассицизм стилӗпе тунӑ. Малтанах ӑна Ҫӗмӗрлери хими савучӗн клубӗ пек ҫӗкленӗ. Унтан ӑна хула фондне панӑ, 1963 ҫулта унта Пионерсен керменӗ куҫнӑ.

flectone.ru сайтри сӑн

ЧР Патшалӑх Канашӗ 30 ҫул тултарать. Ҫак ятпа банкет ирттересшӗн, унтан 500 ҫынна чӗнесшӗн.

Ӑна ирттермешкӗн аукцион йӗркелеҫҫӗ. Малтан палӑртнӑ хак – 1 миллион та 314 пин те 200 тенкӗ. Аукциона ҫу уйӑхӗн 21-мӗшӗнче пӗтӗмлетӗҫ.

Хака мӗн кӗрӗ-ха? 500 бейдж, чӗнӳ хучӗ, сувенир ручкӑсемпе блокнотсем, фотограф, концерт программине йӗркелесе ирттересси, меню. Хӑнасене виҫӗ тӗрлӗ ассортипе, чӑвашсен икӗ ҫимӗҫӗпе /шӑрттан тата чӑкӑт/, такаран пӗҫӗрнӗ шӳрпепе, соусри буженинӑпа, пӗҫернӗ ҫӗрулмипе, ҫырларан янтӑланӑ вӗтӗ кукӑльсемпе, хуплупа, шывпа, кваспа, чейпе, кофӗпе, ҫыртмӑшсемпе хӑналасшӑн.

Хальлӗхе банкет хӑҫан иртессине палӑртман.

Ҫанталӑк ака уйӑхӗнчи пек сивӗ тӑрать. Ӗнер кӑштах ӑшӑтнӑ-ха, анчах паян ав Атлантика циклонӗ килнӗ – кӑнтӑр районӗсенче ҫумӑр ҫунӑ, ҫурҫӗр енче – йӗпе юр. Ҫил вӑйланнӑ, вӑл кӑштахлӑха ӑшӑ илсе килӗ.

Юнкун ҫурҫӗр-хӗвеланӑҫ енчи районсенче йӗпе юр ҫӑвӗ. Ҫу уйӑхӗн 9-мӗшӗнче хӗвеллӗ, анчах сивӗ ҫанталӑк тӑрӗ. Юр вӑхӑтлӑха ирӗлмесен те пултарать. Ҫил ҫурҫӗр енчен ҫеккунтра 18 метр хӑвӑртлӑхпа вӗрӗ.

Ку эрнере питех ӑшӑтмӗ. Эрне вӗҫнелле кӑна 10-15 градус таран ӑшӑ пулӗ. Ҫу уйӑхӗн 9-10-мӗшӗсенче ҫӗрле шӑнтӗ.